Page 204 - ibrahim_tennuri_gulseni_niyaz

Prof. Dr. Muhittin Bağçeci | Dr. Rasim Deniz | Şeyh İbrahim Tennûrî ve Gülşen-i Niyâz

Burundan çıkdı isterken kulağın
Ne başın billu oldı ne ayağın

Tama’ eyler kişiyi bi-sağır vü kör
Halâyık arasında hor olır hor

Tama’lı kişinün olmaz hayâsı
Hayâsız kişinin çokdur riyâsı

Bu zahmun merhemi oldı kana’at
Kana’atlu kişinündür sa’adet

[92a] Kana’at rızka râzı olmak oldı
Rıza içinde Hakk’ı bulmak oldı

Meselden yine maksûda varalım
Söze tutî gibi şeker katalım

Bu dünya ehlidür garga varan
Ciğer kanın herdem suya karan

Dilekler suyıdur kim başdan aşdı
Niçe uslunun anda aklı şaşdı

Niçe âlemlere anda garga vardı
Saru altun içün benzi sarardı

İy nice zâhidün kim yolın urdı
Giderken eliyle boynun burdı

Bûlara yakın olmaklık hatadur
Irak olmaklık anlardan, devadur

Helâk oldı kim anlara ulaşdı
Hasedler rengine gönlü bulaşdı

Cihan bir cifedür kim itler ister
Melek sîretlu kişi anda n’ister

204