Page 183 - ibrahim_tennuri_gulseni_niyaz

İkinci Bölüm | Metinler

Pes veli didi şâha kim yâ emîr
Ol kenizin kim sen aldun ana vîr

[78b] Tâ anun bileliğinden sağala
Hancer elinden bağrı başı sağ ola

Dilberini şâh ana bağışladı
Key kerem kıldı ve key lütf işledi

Nice müddet birbiriyle oldılar
Zevk ü işret kıldılar ü güldiler

Ol kenizek tendürüst oldı temam
Gitdi gam gönlinden oldı şâd-kam

Şerbet içürdi hakîm o zergere
Tâ kenizek usana andan göre

Zerger oldı zerd ve renc ü zaif
Andan usanmağa başladı harif

Rengi soldı ve sarardı kahr ile
Ölmemeklik nite ola zehr ile

Ol kenizek dahi ışkından halas
Buldı kurtuldı şahın oldı has

Rengi sevmişdi renk oldı fena
Lacerem rengi sevenler usana

Rengi sevmek avreta layık durur
Reng ü bûyi terk iden âşık durur

Işkı bî-renk oldı rengi terk iden
Oldurur yâr ile ahdi berkiden

[79a] Buldı bunlar nefs derdine deva
Renk içinden görildi ışk-ı heva

183